الأحد، 29 يوليو 2012

إعلانــــــــات رمضان شئ يدعو للإشمئزاز

و أنتقالاً من أنا أنا دلوعه بابي كل يوم بغير دولابي



لــ أزاى تدفعله و أنت متعرفوش طب أفرض فــــلســـع و ملــقتوش ( لأ, ناصحه يختى ) 



طــ بعاً دنيا سمير غانم بقت عامله زى نيلى و شيريهان لازم تطلعلنا فى رمضان زى الفانوس !

___________________________________________________

أنتقالاً من راجل يا حسام و هووووووب و الهوب متخليش الدمعه تفوط 



لــ فى شعر ما بين الرجوله و --- الى هما مكملوهاش فى الإعلان !! 


فى دكتور الله يمسيه بالخير السنه الى فاتت علق على إعلان بريل الأولانى و قال أنها شركه غبيه و عملت الأعلان لا تتماشى مع سمات المواطن المصري و بطريقه ميقبلهاش نفسي أعرف الدكتور ده عمل أيه لما شاف الإعلان ده رمضان ده و لقاهم مصممين على المبدأ ,, 
أكــــــــــيد أنتــــــــــــــحر خلاص !! 
__________________________________________________

و من عربيات الفرحه إلى بتلف شوارع مصر من السنه إلى فاتت
لنفس العربيات إلى لسه عماله تلف شوار مصر لحد السنه دى
و مع ذلك لم يحالفنى الحظ أنا و ألاف المصريين إن لم يكونوا ملايين مشوفوهاش ؟!!
متسبوها على راحتها يا جماعه ميمكن بتحب تصيف فى جمصه !



____________________________________________________

شبسى جامبو من قبل رمضان و هو مبيخلصش سبحان الله 



و لما رحت أشتريته قولت أتسلى فيه 3 أو 4 أيام  
خلص فى يوم واحد ؟! 
حاجه من أتنين يا أنا إلى طفسه يا إما الأعلان بيستهبل ..؟!

___________________________________________________

السنين الى فاتت أم نبيل كانت سبنى فى حالى الدنيا صيام أعمل أيه أصل أنا خرمان و هى الى مكتسحه الأعلانات 
السنه دى بقى أتصالات و موبينيل قالوا إشمعنى أم نبيل يعنى ؟؟!! 
قاموا أتصالات عملولنا أنت جميل متقولش على نفسك كده 



و فودافون وقعت الديكور على دماغ ماما كريمه قبل متفرد جناحتها و سمير غانم و فاروق الفيشاوي !! 

_________________________________________________

أوبا بقى على بيض العيون الى جواه الماظ حر 27 قيراط :D
 و أوبا على ده و ده و ده الى جواهم ألماظ 
و أوبا على تقل دم الى جايبنها تعمل الأعلان أصلا :S 
و أوبا بقى و بقى و بقى على أم ده عيل رزيل جاى يقولها مش هقولك سر ( سر لما يلهفك يا بعيد فقعتلى المراره ) 

_________________________________________________

البت لسه صغيره صغيره على أيه بقى 
زمان سعاد حسنى كانت صغيره على الحب دلوقتى البت الى سارقه لبس سندرلى دي 
صغيره على ملوخيه بالسمنه الفلاحى قال يعنى طريقه الطبخ بالسمنه الفلاحى غير العاديه 
و دى لو فلاحى أصلاً  كلو ضحك على الدقون يا أوختشى بلاش تنساقى ورا الشائعات و فى الأخر تطلقى من كذب الأعلانات 

_________________________________________________

أبويا أبويا الله يخربيتك عملت أيه .؟؟!  بلع أبوه و بلعه ؟؟ عجبك كده كان لازم تدافع يعنى و تعمل هركليز ؟! 
عملت أيه بقى علشان تبلع الواد و أبوه ؟؟ 



أكلــت أيس كريم صح ؟؟ 
طب تمام أوى أنا هاكل الأيس كريم ده و أروح أبلع أى حد مضايقنى 
و كل واحد دكتور مضايقه فى الجامعه مدرس مزعله فى الفصل واحد رخم بينم عليه ليل نهار يستدرجه و يكلمه و يبلعه 
تمام كده ؟؟!! تمام أوى .. إحنا ناس زى الفل و الجيشطه 

__________________________________________________



البنك الأهلى المصرى هيعمولك أى مشروع صغير ماشى يا سيد الناس ؟؟ ماشى فل 
يعنى المدرسه هتفتح حضانه و الى عاوز يبقى فطايرى هيفتحوله محل فطير
و الى بيحب الميكانيكه و الظروف رمته فى التمريض هيفتح الورشه بتاعته 
و الى عاوز يشتغل حلاق هيفتحوله كوافير رجالى 
لا و أيه القسط بعد سنه و لو مدفعش بعد سنه و المشروع مشتغلش هيتحبس ده بقى إلى الأعلان مجبش سيرته فى حاله فشل المشروع أو تأخره فى الربح مثلاً 
السؤال هنا أيها البنك مينفعش تخلى الطالب الى جاب 97.5% يدخل طب لان ده مكانه بدل مهو اترمى فى تربيه ؟؟! 
و الى جاب 98.5% يدخل طب  لان ده مكانه المفروض ؟؟ 
طبعــاً لو عملت كده فى الحاله دى بس كلنا هنصدقك و هنسقفلك كمان و هنهتفلك لو عاوز 
___________________________________________________



رمضان قرب يخلص و أنا لحد دلوقتى معرفتش أيه هو نستنى 
بس عاوزه أعرف الأخت صحبه مون مون مالها ؟ 
بيكاتا بالشامبنيون أيه الى هتاكلها عند نستى هو كل حاجه فى الدنيا أكل 
فضحتونا الله يفضحكوا ! 
___________________________________________________



سيرين عبد النور عملت روبي من هنا و قلبت إعلانات من هنا بعد ما الناس كرهتها 
و بقت بترمي سلامها على أصحابها واحد واحد بالدور و فى حاجه بينها و بين حد بيور بس بصراحه الواحد ملحقش يلقط اعلان 
بس بصراحه اختيارهم للالفاظ توحفه بالذات كلمه ( أربعه )  مش الرقم لا الى هى بلبعه يعنى حاجه سو ناااااااايس 

_____________________________________________________

وفى النهايه أحب أقلكو الأعلانات ما هى إلا دحك على الدقون و خراب بيوت و هبل فى الجبل و جبلايه القرود 
لو مصر عملو فيها رقابه على الأعلانات مكنش تدنى مستواها كده 
أن شبكه تشين بالشبكتين التنيين فى إعلاناتها 
و لا إن يكذبوا و يقولولك سمنه بريحه و طعم الزبده و التانيه فلاحى و هى مش فلاحى و لا هباب 
لو كان فى حاجه اسمها شروط للإعلانات كان زمنتانا دلوقتى فعلا بنشوف الحقيقه فى الاعلان مش افوره و اخفاء للعيوب 
لو مكنش فى ناس هايفه أكيد مكناش شوفنا إعلانات زى دي و غيرها من الأعلانات الى حياء الواحد منعه أنو يتكلم عليها 
وصلنا لدرجه متدنيه فى الأعلانات لا نحســد عليها إطلاقاً


لــ ياسمين جمال 
30\7\2012

4 التعليقات:

محمد جمال يقول...

بجد رائعه
رسمتى الابتسامه على شفاهنا
دمتى مبدعه
كان لى الشرف فى التواجد هنا

غير معرف يقول...

جميل جدا ياانسه ياسمين فعلا ده وقع واحنا مع كل اسف بقى عندنا غباء تسويقي وبقى كل فكرنا عن الاعلام عموما ان اللى بيضحك هو اللى بيعجب الناس وصلنا لمرحله حتى الاعلانات فيه بقيت شيء مقزز ومستشري

لينا السيد الهريجى .Dr\L.s.H090 :) يقول...

المقال عسول يا ميما :) بس اصلا مفيش رقابه على الافلام ولا المسلسلات العجيبه اللى نزله و بتفطرنا بمجرد ما نشوف التتر بتعها بس :\ الله يخليكى عايزين المقاله الجايه عن المسلسلات

سميّة إمامـ يقول...

موضوع جميل فعلاً

إرسال تعليق