الثلاثاء، 4 سبتمبر 2012

مفيش حاجه أسمها "عانس"














" أقسي على قلب بدل متضطر فى يوم أنك تقتله  " 
متعلقيش واحد بيكي علشان أنتى عاوزه عريس وخلاص علشان خايفه تعنسي ! 
و ظهرت الظاهره العجيبه اللون الغريبه الشكل للمسروعات على الأستقرار و معايشه قصه حب عندها ألتهابات
البنت من دول أول ما ولد يقولها  ( بحبك ) متصــــــــدق و تكلبش فيه و تقولك أصل أنا أش ضمنى أن ممكن يجي واحد بعده و متصدق و هى أصلا و لا تعرف شخصيته و لا تفكيره و يمكن عارفه الحاجات دى و شايفاها مش متوافقه بس بالغصب خلتها متوافقه مهى عاوزه أى واحد و خلاص المهم واحد يلبس دبله مكتوب عليها أسمها و هى تحط اسمه على دبلتها و تتشعلق فى دراعه أدام صاحباتها و تتنك عليهم و هى بتقلهم أنا أتخطبت !! و يمكن من قبل ميتخطبوا يجلها واحد أحسن منه و يتقدملها او يقولها حتى بحبك تروح  تسيب الغلبان الاولانى و من غير سبب تقوله احنا مننفعش لبعض و مش متوافقين اه بتحصل و الله ده بقى الجبروت ! 
و بعد متتخطب للتانى تقوله شوفت سمير جاب لسميره أيه فى عيد جوازهم شوفت أحمد جاب أيه لمنى فى عيد ميلادها  شوفت مش عارفه مين جاب لمراته طقم الماظ كامل :S مهى مجوزاه مش حباً فيه لا دى كانت خايفه تعنس بس ! 
حاسه بأيه أنتى يا الى بتعملى كده ! أنتى متعرفيش أن ده قلب إنسان و من الأخلاق المحترمه للبنت بردو أنها متظلمش واحد حبها يعنى 
قوليله من دلوقتى انكو متنفعوش لبعض أحسن متعلقيه بيكي و لما يجيلك احسن منه تسيبيه ؟ تفتكرى أنتى مش هتاخدى ذنب لا هتاخدى لأنك ظلمتيه من غير ميعملك حاجه وجعتيه ! و ما أدراكى و ما عقاب الظالم يوم القيامه ...... 
على فكره من الحيوانيه بس أنك تقبلى بواحد لمجرد انك خايفه تعنسى او يفوتك تاكسى الجواز ! 
أه من الحيوانيه لأنك بدل متبصى للتفكير و التوافق والشخصيه و الفكر بتبصى لورقه هيتكتب فيها انك مجوزاه و 80% جواز محكوم عليه بالفشل من كتر مهو مش راكب ! 
خليكــــــــــــي بنى أدمه محترمه توزنى تقلك عقل يوزن بلد و شخصيه ممتازه و تفكير محترم و خلى الناس تحترمك و أحترميكي أنتى كمان و أول مهتحسى أنك بتحترمى نفسك عمرك مهتدي نفسك إلا لحد انتى مقتنعه بفكره و عقله و مبادئه و شخصيته 
أهتمي بنفسك و أحترميها أهتمى بيها مش بالميكب و الروج و البلاشر و الباودر و الأى لاينر  أهتمى بيها بالعقل الموزون و التفكير الصح المحترم و الرقى الفكرى و المبدئي ...... غيري جواكى الأول و براكي أمره سهل  
متجرحيش إنسان كل ذنبه أنه حبك علشان أنتى عندك عقده و خايفه من بع بع العنوسه 
المجتمع غلطان غلط أولى لأنه هو الى خلقلك العقده دى بس لو المجتمع غلط لازم أنتى يكون عندك المضاد النفسي الكافى لأنك تنبذى مبادئهم و مصطلاحتهم الغلط بدل متخافى منها و تجاريها 
متجاريش إنسان قالك أنو بيحبك لمجرد أنك شايفاها فرصه للتخلص من لقب أنسه أوو عانس لأنك هتوجعيه لما يكتشف أنك مش مقتنعه بيه و مش حاسه بيه و مش بتحبيه قد حبه ليكي 
أنا مقره و معترفه أن نسبه البنات دى مش كتيره أوى قد نسبه مثلا حاجه زى الولد الى بيلعب بالبنت بس طالما ظاهره و موجوده يبقى لازم تتناقش و لازم الحق يتقال أى كان فى صف مين أو ضد مين ! 


لـــ ياسمين جمال 
5\9\2012

الاثنين، 3 سبتمبر 2012

يوميات واحده بتعرج :D











و بما أنى مشروع دكتوره قدرياً و مش بمزاجى كان لازم أعمل عمليه فى رجلى بس كنت عامله زى العيال الصغيره و أنا بهرب من اليوم ده يوم أقول عندى نادى و يوم أقول مش فاضيه و يوم أعمل نفسى ورايا معاد مهم و اخرج مع صحابى و اخرجهم غصب و أقتدار :D ,,,, كنت بحاول بكل الطرق  و بما أنى بقى دكتور العيله :D ماما استدعتنى علشان جدتى هتعمل عمليه و لازم اكون معاهم علشان اطمنهم عليها بعد العمليه و بالرغم من أنى صيدله مش طب بردو جرجرونى لحد المستشفى و بعد مجدتى عمليه العمليه بالسلامه و خرجت من أوضه العمليات لقيت الممرضه بتقول سلمى خضير فين تجهز فبصيت لماما و انا برد عليها بكل ثقه ايه ده فى حد من قرايب بابا هيعمل عمليه شكله ؟! لقيت ماما بترد عليها بتقلها أصدك ياسمين خضير و فى عدم أستيعاب بصتلى الممرضه قالتلى انتى قلتلها لا مش أنا :D قالتلى أنتى حفيده الحجه ليلى ؟ قلتلها أه قالتلى أيوه يبقى أنتى تعالى يلا أجهزى بصيت لماما و انا فى قمه التوهان اجهز ليه ؟
ماما : يلا يا ياسمين بلاش دلع دى حاجه هايفه يعنى
عمليه لا عمليه لا ده الى نزل عليا لحد ملقيت الدكتور بذات نفسه طالع من اوضه العمليات بيقولى يلا يا دكتوره و زى ميكون الدكتور بكلمته دى بيحرجنى علشان أدخل أوضه العمليات عيب على سني و مركزى 
دخلت و أنا شبه بترعش من جوايا من الخوف و كل الى بيدور فى دماغى طب افرض هو و هو مش واخد باله دخل وصل للأعصاب قوم أنا اتشليت ايه الى هيحصل ؟ و ابتدت التخيلات تشتغل بقى لحد ملقيت دب دب دب حقينه ورا التانيه و را التالته بعد ملميت عليهم المستشفى اضطروا انهم يخمدونى خالص فجت الممرضه دبت حقنه فى دراعي وريد و من ساعتها محستش بحاجه و ارتاحو من قلقى 
قبل مانام حطو رجلى التانيه على حديده كده على فوطه مبلوله من بتوع العمليات دول و الممرضه بتقولى حطى رجلك على دى قلتلها لا دى بتعمل ايه قالتلى يا بنتى مبتعملش حاجه ده جهاز بس حطى رجلك قلتلها لا و صممت انو لا لحد مقالتلى انو ده علشان و الدكتور شغال فى رجلك التانيه متكهربيش :D زى الصاروخ حطيت رجلى عليه و تبت فيها :D ( أنا بخاف من الكهربا جداً من صغري ) 
خرجت بالسلامه لقيت التعليمات بتُملى عليا بقى 
ممنوع المشى توقفى الرياضه تصلى و انتى اعده لو اضطريتى تمشى ترفعي رجلك من على الارض :\ 
حبس أنفرادي لمده أسبوع لحد متخنقت من تعليمات الدكتورر و عادى جدا نزلت و رحت النادى بردو و لفيت البلد كلها :D و محلاليش اعمل مشاوير إلا ساعتها زى مكون غتاته و عند 
و توته توته خلصت اليوميه :D 
أشوفكو المره الجايه