الثلاثاء، 3 يوليو، 2012

فى دعوه التدوين اليومي . تدوينه اليوم الــ 15 الموحده لكل المدونين المشتركين | إجاباتي !



1/ عرف نفسك ؟


طالبه بكليه الصيدله - بورسعيديه و دى حاجه بأفتخر بيها :) - طموحى عمره مكان ليه علاقه بالصيدله بس خلاص بقت قدري  - بحب الشوكلاته جداً :D - أعقل المجانين - بكره جداً الكعب العالي - بكتب و فى ناس بتقول أن عندي الموهبه دى 
بحب جداً النشاطات الإجتماعيه -

__________________________________________________

2/ ما أكثر ما يميز شخصيتك ؟

مش شايفه بصراحه حاجه تميزني ,, الي يجاوب على السؤال ده الناس الى أتعاملت معايا مش أنا 


__________________________________________________

3/ ما هى اهم نقطة تحول فى حياتك ؟

نقطه التحول فى حياتى كانت تانى سنه ليه فى الكليه ,, غيرت عندي مفاهيم كتير و مبادئ كتير و كانت بدايه خروج كتابتي للنور إلى حد ما ,, و تحولت من السذاجه المطلقه إلى مرحله ( فاهمه الى أدامي عاوز أيه و ناوي على ايه ) ,, و معنتش بتخدع فى الناس بسرعه أو بكتر ما كنت بتخدع قبلها ,, بدأت أعتمد على نفسي أكتر من الأول 

__________________________________________________


4/ كيف دخلت الى عالم التدوين ؟

من واحده صحبتى من أيام المدرسه قالتى أعمل مدونه لأنها كانت شايفالى مستقبل فى المجال ده , و بعدها بفتره واحده صحبتى تانيه برضو من أيام المدرسه قالتلى أعملى صفحه على الفيس بوك و عملت و نجحت الحمدلله فى إنى أدخل العالم ده و أأثر فى بعض الناس  :) 


__________________________________________________

5/ ما اسم مدونتك ولماذا اخترته ؟

مدونه يوميات طالبه مصريه : أيام قصف غزه فى 2008 2009 تقريباً كنت مشتركه على منتدى و كان فى عرب كتير بيهاجموا مصر و ساعتها أنا كنت واحده من المدافعين عن بلدى و شعبها ,, فعملت أسم مدونتي كده لأنى عمرى مكان ليا إلا الفخر إنى مصريه مهما حصل 

__________________________________________________



6/ صف مدونتك ؟

ممكن أقول أنها أكتر مكان بهرب ليه علشان أرتاح من الناس و كذبهم و نفاقهم و خداعهم ,, المكان الى بروح علشان أحكيله الى مضايقنى و فى نفس الوقت بردو أول مكان برحله لما بكون فرحانه ,, و المكان بردو الى بروح فيه علشان أسرح بخيالى شويه و أخترع أحداث و أعيش حكايات عمرى معشتها أو عشتها . 

__________________________________________________


7/ من هم أكثر ثلاث شخصيات أثروا بك من داخل عالم التدوين ؟ ومن خارجه ؟

أصحابي الى فى دقه جديده نفر نفر أثروا فيا جدا و برغم أنى مشوفتهمش قبل كده و مجمعتنيش الصدفه بيهم إلا أنى قد أكون بحس بالأنتماء ليهم زى مكون اعرفهم من وانا فى اللفه :) ,, و كلهم يعتبروا كتاب و مدونين .

__________________________________________________


8/ ما هى طقوسك الخاصة عند الكتابة ؟

أغنيه بستوحى منها الMOOD بتاع الكتابه , هدوء تام , مشروب دافئ :) 

__________________________________________________


9/ ما هو الاسلوب المفضل لديك فى التدوين ؟

الساخر برغم أنى معنتش بكتبه كتير ,, و بحب أكتب فصحى أكتر من أني اكتب عاميه 


__________________________________________________

10/ فى رأيك ما أهم ما يميز تدويناتك ؟

بردو السؤال ده مش أنا الى أجاوب عليه لأنى عمري معرفت أقيم تدويني و أغلب الوقت بشوفه مش قد كده ,, فالى يجاوب السؤال ده الناس الى قرتلى مش أنا 

__________________________________________________



11/ ما هو تقيمك لعالم التدوين فى الفترة الاخيرة ؟

نشيط جداً , الناس بدأت تكتب و متخافش و إلى طموحه فى إنه يطلع كاتب كان مات بدأ يصحى تانى لأن فى مجال ناس تقراله 

__________________________________________________



12/ اختر اقرب تدويناتك الى نفسك وضع رابطها وحدثنا عنها ؟

مفيش حاجه كتبتها و مر عليها وقت و عجبت الناس إلا لو حبيتها و اعدت اقراها كذا مره زى مكون مش أنا الى كتباها 

بس أنا ممكن أطلع أكتر تدوينه لما كتبتها كنت واثقه أنها حلوه و هتعجب الناس  

و بحبها لأنى فعلاً بيها و صفت نفسي هما تدوينتين يعتبروا تدوينه بس على جزئين 



__________________________________________________


13/ استعرض اهم المواقف الغريبة او الطريفة التى صادفتك مع التدوين ؟

بصراحه المواقف كتير جداً ,, الغريبه : الناس الى بتاخد الكلام على نفسها و خاصه فى التدوينات الى بتميل للرومانسيه بلاقى ناس داخله معرفش ده استظراف و لا هبل ,, داخلين يردو أكن الكلام ليهم  و دي حاجه خلتنى أبطل أكتب فتره مش قليله .


__________________________________________________

14/ هل أحدث التدوين تأثيرا عليك ؟ وكيف ؟

كبير جداً ,, من بعد مبدأت أكتب و الناس تقرالي حسيت أنى لقيت نفسي و بدأت أبقى إيجابيه نحيه أحلامي و طموحي و بدأت أحس أني مفيده فى شئ , عايشه علشان حاجه , أدتنى جرأه فى حاجات بكتبها عمرى مأجرأ أقف و أتكلم عليها أدام الناس . 

__________________________________________________



15/ اختر أى مدون ووجه له سؤال ؟

مفيش فى دماغي أي أسأله بصراحه لأنى لما بعوز أسأل حد بأسأل أول بأول مبحبش أسيب فى نفسي حاجه :D 

____________________________________________________________________________________________________________________________________________________



ياسمين جمال 

4\7\2012

12 التعليقات:

Aya Mohamed يقول...

اجابات مباشرة و واضحة و لذيذة
حسيت حالة من النشاط
لايقة على انها تتقرى الصبح بدرى كدا
ربنا يوفقك يا جميلة وتحققى كل اللى بتحلمى بيه
ان شاء الله

Deyaa Ezzat يقول...

هو إيه العلاقة الغريبة بين الصيادلة والتدوين في الفترة الأخيرة D:

بالتوفيق دايما يا دكتورة ياسمين

وجع البنفسج يقول...

سعيدة اني تعرفت عليك أكثر من خلال هذا البوست ..

بالتوفيق دائما في حياتك العلمية والتدوينية ^^

shreif elsaftty يقول...

رائع جدا كلام من القلب للقلب سعيد انى اتعرفت عليكي ياانسه ياسمين

habiba يقول...

بســيطة جدًا ما شاء الله..
ومن رأيى أن مدونتك جميلة ربنا يبارك لك فيها
وسعيدة بالتعرف عليك ^_^
دمت بخير

ابراهيم رزق يقول...

اهلا ببورسعيد و اهل بورسعيد

سعيد بالتعرف على مدونتك

تحياتى

Sara يقول...

جميل إني أسمع الكلام دا منك مباشرة يا ياسمين :)

بالتوفيق :*

سندباد يقول...

خير الكلام ما قل ودل
اجابات صريحة وبتلقائية شديدة
سعيد بحملة التدوين السنادي لاني اتعرفت علي شخصيات محترمة وفكر تدويني رائع
سعداء بالتعرف عليكي

eng_semsem يقول...

سعيد بتواجدي بين كلماتك في حفلة التعارف الجميله اللي اتنظمت النهارده
وبالتوفيق دايما يا دكتوره

yasmeen gamal khodeer يقول...

MERCI يا آيه :) ربنا يحققلنا كلنا احلامنا ان شاء الله
Diaa معرفش بس على فكره معظم الصيادله عندهم مواهب تانيه خالص غير الصيدله مش شرط الكتابه انا تقريباً كل دفعتى نفس النظام :) ,, نورتنى
وجع البنفسج : نورتيني يا جميله :)
sherif أهلاً بيك ,, نورت
habiba أنتى اجمل و أنا أسعد :)

yasmeen gamal khodeer يقول...

ابراهيم رزق : اهلا بيك
ساره : يا حبيبتي يا سوسو :) :*
سندباد : شكراً
eng_semsem : شكراً ليك

ايام وبنعشها يقول...

بجد انتى جميلة اوى واسلوبك حلو جدا وحتى صريحة مووت يارب تتحققى ال بتحلمى بيه ويوفقك وتوصلى لل انتى عايزاه

إرسال تعليق