الأحد، 2 أكتوبر، 2011

أريد عريساً

- دلوقتى بقت نصايح اى حد لاى بنت لو لقيتى عريس هاتيه و كلبشى فيه محدش لاقى عرسان اليومين دول !!
( فكرونى بفلم عريس يابوى :D ) 



- تلاقى الام عماله تقول لبنتها خسى خسى خسى و كل ده علشان ايه ؟؟!! علشان تتخطب :D
 و تلاقى البت الغلبانه شبه الارنبه ماسكه الخس و الخيار و الجزر و هاتك يا سلطه علشان تخس حتى لو مش تخينه :D  



 قال يعنى مش هتتخطب الا لما تخس !!



- و أم تانيه لو شافت بنتها نازله من غير مكياج تقولها خشى يختى حطيلك احمر و لا اخضر على وشك خلى عقدتك تتفك !!


يعنى يا طنط هى عقدتها مش هتتفك الا لما تحط احمر و اخضر .. سبحان الله يا ربى !!

- أول ما البنت تعدى العشرين و تكون لسه متخطبتش تبقى دى المصيبه الكبرى تلاقى اول ما البنت تدخل من الباب 
امها توطى على ودن ابوها و بعدين فى البت دى يا ابو محمد يرد ابوها و الله معارف يا سعاد ترد الام ربنا يستر و متعدش فى ارابيزنا لاخر العمر .. 


هتبيعوا بنتكو للي يشيل مثلا !! 


- أمهات تانيه خالص بقى تاخد بنتها و تلف بيها فى نوادى و كافيهات مصر كلها لعل حد يشوفها و تتخطب :D 
بيفكروا بطريقه قديمه فحت !! :D  

- فى بنات بقى هتموت و تتخطب لاى حاجه ان شا الله ديك معدى مش مشكله
 المهم كلمه ذكر !!
مع أن فى بيكتبلهم ذكر و هما محصلوش ربع بنى ادم اساسا !! 



- قول لبنت أن واحده صحبتها أتخطبت !! 
ده أنت يبقى يومك أسود لو عملت العمله دى !! 
تبص تلاقى لون وشها قلب فحلؤى
و تبصلك كده و تقوم ترد تقول على ايه ؟؟!! دى مش حلوه خالص
و لو قلتلها ان واحده تانيه اتقرى فتحتها ترد عليك و تقولك 
مالك بتجيب اخبار زى وشك ليه كده !! 
و البعض الاخر لو بلغتها ان زميلتها اتخطبت 
تقولك يا عينى عليا !! 
بقى ***** تتخطب سبحان الله .. ارزاق 
لا و تلاقى نفسيتها وحشه اوى ده انت لو قلتلها ان صحبتها ماتت مش اتخطبت رد فعلها هيكون اهون من كده !!

- لو واحده عرفت بقى ان فلان هيخطب فلانه فى المستقبل القريب 
تلاقى احدى الزنانات تروح عند فلان شوفت ---- سوت و عملت و و و 
و هاتك يا كذب و افتراء لحد ميحلف لهو خاطب الاسبوع ده اى واحده غير فلانه 
- بنات تانيه بقى زهقت من زن اهاليها و بقت عاوزه تتخطب مخصوص بس علشان تخلص من الزن !! 
- و فى الى تلاقيهم بيحبوا على نفسهم و تلاقيها كاتبه فى الحب و الغرام و الهيام و فى الاخر تمضى اليك يا زوجى المستقبلى !! :D  
دول الى قربوا يتجننوا .. !!

- فى كاتبه ما دايما تكتب حاجات عجيبه كده و تتخيل انها اتجوزت و تكتب الحياه هتبقى عامله ازاى بقى و جوزها يعد على السفره و يستناها لما تجيب صنيه البطاطس من المطبخ :D  
دول بقى الى اتجننوا يا عينى خلاص 
( انا بقرالها و مرارتى بتتفقع الست دى ) 

- فى بقى الى تعملك فافى و بنت ناس و دى بتتأثر بالافلام عادهً
تقولها بتعرفى تطبخى ؟؟ تقولك لا ( و هى اساسا بتطبخ كل حاجه ) 
تقلها تحبى تفطرى ايه تقولك ( باتون ساليه و ساليزون ) 
تقلها تشربى ايه ؟؟ تقولك لا مرسى انا عامله دايت 
تقولها انك بتحب الباميه تقولك 
يعنى ايه باميه ؟؟!! 

قال يعنى كده بقت بنت ناس !! :O

هذا ,, و
 الى ان القاكم فى وقت قريب 
اتمسوا بالخير !!


ياسمين جمال 
2\10\2011

7 التعليقات:

Bent Men ElZman Da !! يقول...

ههههههههههه
كلامك تحفه بجد
فى ناس كتير اوى لسه مش مستوعبين ان حكايه الخطوبه والجواز دى نصيب وان الواحد مهما اتشقلب مش هياخد غير نصيبه اللى ربنا كتبهوله فى وقته
وماحدش يعرف نصيبه فين ولا امتا

تسلم ايدك يا ياسمين على البوست :)

ياسمين جمال خضير يقول...

:)))))))) اه و الله مش مستوعبين انااعرف واحده عنيها دمعت لما عرفت ان صحبتنا اتخطبت :D ..... تسلمى يا حببتى

ديارا المصرى يقول...

ياااااااااااااااااااخبر ابيض
كلامك مظبووووووووووووط جدااااا
هههههههههههههههههههه
فعلا عندك حق .....
سعدت جداااا بوجودى فى مدونتك الراااااااااائعة

ياسمين جمال خضير يقول...

انا اسعد يا جميله :)) منوراها

Dalia Starwalker يقول...

هههههههههه فعلا بجد

مسلم مصرى يقول...

التخيل والتمنى مش جنون ، لما توصلى لمرحلة نفسك قوى تتجوزى ومفيش !! ، ومش مهم عندك مين اتجوز او طلق بتتمنى السعادة لكل الناس بس من الوحدة بقى يبدأ التخيل وممكن اكتب عن كدة عادى بفضفض بدل م اموت :)

عم دونجل يقول...

يعني ايه بامية :D :D

إرسال تعليق