الأحد، 29 أبريل 2012

و للنم أنواع , هذا أبشعهم !


أراهم يتغامزون و أحياناً أسمع بعض من كلماتهم السامه المليئه بالحقد الغير مفهوم ؟! 
يقفزون هنا و هناك يتحدثون قائلين أحبت هذا و هذا يحبها تكره هذا و هذا يكرها 
و عندما أتوقف عند أحدهم لأذكره ببعض نقاط العمل
أجدهم فى اليوم التالى يقولون ( باين أوى أنهم بيحبوا بعض)
ثم تأتينى أخرى فى الصباح لتقول لى بكل خبث ( مبروك الخطوبه ) 
عن أى خطبه يتحدثون ؟؟! 
أخشى أن أستيقظ يوماً أجدنى متزوجه ؟ 
ثم تذهب أخرى تسأل صديقتى هل هى تحب فلان ؟ 
و تخبرها عن أهتمام هذا و رغبه هذا فى الخطبه و نوايا هذا فى المستقبل القريب 
ثم تنهى كلامها بــ ( مش عارفه هى متقنعره على أيه حد لاقى ؟ ) 
تباً لأنوفكم التى تُحشر فيما لا يخصكم ! 
و تباً لأدوار العرافات التى تعشقون تمثيلها
 و لكن أود أن أخبركم أنكم جميعاً عرافات فاشلات 
و بعدما تقول ما تقول و ( تعك و تلبخ )
 تأتى صباحاً أخر و تضمنى بشده
 حتى أكاد أن لا أصدق أنهم من تحدثوا كل أحاديث الامس و نميمته 
أتعلمون ! 
كم أشفق عليكم لأن من شده الفراغ و الحياه الغير هامه التى تعيشونها تحاولون أن تبحثوا عن أى شئ تجدوه مثير للجدل لتتحدثوا فيه و تتقربوا لأخرين به و تجعلون أخريات يعشقن جلساتكم و أجتماعاتكم نظراً لأنكم تأتون بأحدث الاخبار 
مساكين هن تلك الاخريات لا يعلمون أنكم عرافات فاشلات لا تقرأن النفوس جيداً 
يظنونكم محطات إخباريه ممتازه ,, لا يعلمون أنكم تتفننون فى أختراع الأخبار 
أشفق عليكن جميعاً و على نفوسكن المريضه التى تعشق النميمه  !! 

لــ ياسمين جمال 
29\4\2012

الثلاثاء، 17 أبريل 2012

يوم شم البسين

16\4\2012 
يوم الاتنين الساعه 1 الضهر 
شم النسيم بقى و كل سنه و أنتو طيبين و كده بقى 
قومت و رحت أفتح شباك البلاكونه و قولت أشوف الناس و يا رتنى مشوفتهم 
لقيت مفيش بنى أدم فى الشارع إلا و ماشى بشورت و شبشب بصابع أهم حاجه أنو بصابع !



لا و لا ألوان الهدوم حاجه ( بوروبروء ) 
و أمام كوك دور مباشره 
عائله نازله من التاكسى حيث الاب لابس شورت و تيشرت و شبشب بصباع 
و الابن لابس نفس الكلام ( الزى الرسمى بقى لليوم العصرى ) 
و الأم شايله ( كولدير ) و البنت شايله حله :D  ( انا واثقه ان كان جواها محشى ) 
و قرد صغير شايل عوامه 
بالبديهى كده الناس دى شكلها رايحه البحر 



بس بحر ايه ده الى ادام كوك دور :S  ؟؟؟ 
انا رحت أتأكد من ماما البحر فين !! 
واضح أنهم مش من هنا و حد وصفلهم مكان البحر غلط 
و فضلت مراقباهم لقتهم فعلا كلموا كذا حد معدى و الله اعلم بردو كان شكلهم بيسألو على البحر 
قاموا و قفوا تاكسى تانى وركبوه و  مشوا :D  انا كان هاين عليا انزل امشى وراهم ( فضول بقى ) 

ندمت على اللحظه الى فكرت أخرج فيها البلاكونه 
و جيت أدخل من البلاكونه على البيت تانى
 و يا رتنى مدخلت ندمت على اللحظه الى فكرت ادخل تانى كان مالها البلاكونه :D
مراسم أحتفال أكل شم النسيم بدأت فى المطبخ شكلها 



فقررت أهرب من البيت خالص و أتصلت بإحدى صديقاتى الصدوقات :D  
و يلا هوبا البسى و هفوت عليكى يا عسليه ! 
و انا نازله من العماره كنت حاسه انى نازله من عند الفسخانى 
العماره كلها بتقيم المراسم فى نفس التوقيت تقريبا :S 
و حينما أخدت صحبتى و رحنا نجيب أيس كريم و يا رتنا مرحنا نجيب أيس كريم :(( 
واحد واقف فى قفانا و مصمم أنو عاوز واحد أيس كريم 2 بول :O ( يا عم أسمها بوله ! )

فكرنى بفيلم -- تاخد بوج بول و لا بوج برتوجال ! --
و تانيه واقفه ورانا و راسها و ألف سيف أنها عاوزه واحد أيس كريم حليبه O.o  
قلنا خلاص مفيش مشاكل أخدنا الايس كريم بأعجوبه الى اعدنا نص ساعه واقفين علشان نجيبه 
ثم أنطلقنا و أعدنا فى كافيه أبو عصام 
و مطلعش أبو عصام خالص ( طلع أم عصام ) 



و نظراً لأزدحام الكافيهات الى أنا متعوده أعد فيها
لقيت أن أبو عصام فاضى فقولت بيس أهو نجربه 
و يا رتنى مجربته :'(  
جه الجرسون و سالنا احنا عاوزين نشرب ايه و طلبنا 
صديقتى العزيزه طلبت عصير و أنا طلبت فروتشينو 
بصلى الراجل قالى اه مش ده الى هو كاكاو و نسكافيه و كريمه لبانى 
بصتله قلتلو اه 
قالى طيب لازم يعنى :D  بصتلو قلتلو لازم ازاى يعنى مش فاهمه ؟؟ 
قالى خلاص اوك و مشى و انا لسه متنحه مش مستوعبه هو ايه الى لازم يعنى !! 
نفس عمو الجرسون هو هواه عمو الشيف :D  
يا صلاه النبى يا صلاه النبى ! :D  
و جه و حطلنا الطلبات إذ فوجئت بماج منظره عجيب جدا
من أبو 2 جنيه و نص الى بيبتباع على الرصيف :D 



الفروتشينو المفروض الكريمه بتتحط على الوش انا لقيته بقى ضاربلى الكريمه مع الكاكاو مع النسكافيه و حاجه فل :D 
 و صحبتى طلبت عصير شربته حست أنها بتشرب  volatile oil  :D  



اذ جه 2 شكلهم عجيب و اول مدخلو كانو بيبصولنا اكننا نازلين من كوكب عطارد 
و بعدين واحد منهم من و هو اعد فى الطربيزه بتاعته سال صحبتى هو فى حد هنا بتاع موبايلات اصلنا مش من هنا 
( البلد كلها كانت مش من هنا اليوم ده O.o  ) 
:D اول محسينا اننا كائنات غريبه
 طلبنا الشيك من عمو الشيف و الجرسون فى نفس الوقت :D
لما جالنا قفشنى  و انا ببص للماج بارف ,, قالى ايه وحش ؟؟ 
قلتله لا يا عمو تسلم ايدك قالى انا عملتهولك زى ماطلبتى اهو 
:D  يا حلاوه ,, دفعنا و مشينا و كان نفسى اقترح على الراجل فعلا أن ام عصام اسم أنسب بكتير من أبو عصام 


و يوم كده كان كلو شورتات و شباشب و الوان فاقعه و روايح تقرف 
لكن كان ظريف و لما افتركه أدحك 
و الى ان القاكم فى وقت لاحق 
لكم منى أطيب التحيات :) 

لــ يوميات طالبه مصريه جدا 







الاثنين، 16 أبريل 2012

حواء تتحدث




لأجل الحب أنتظِر قُرُون
و لكن شَخص 
يعلَم كَيف يَكون واضِح و صَريح
و يُخبرنى بِكُل التفَاصِيل 
لا يُقصِينى مِن مُشاركه الافكار و القرارات !

***


لا أنتظر من أدم أكثر من تَوقُعاتى 
فأنا لم أعُد أثِق بأحدهم إلا بأبى 
و هذ هو الإستئناء الوحيد  ! 

***


بَخيل هو أدم فى عاطِفته 
تُعطيه حَواء الحُب و الحنان 
و يُعطِيها هو الأهمال أحيانا ..
و الامبالاه أحياناً أخرى ..
و القَسوه أحياناً كثيره !

***


لن أستَطيع أن أشعُر بالأمان مع شخص 
يخشى أن يُخبرنى ما يؤلمه 
و لا يأمنى على أسراره  ,,

***


عفواً ..
فأنا لن أقبل إلا برجل
لا يجعل رأسى تدب على وسادتى إلا و أنا راضيه 
فلن أقبل برجُل يَتركنى أيام و شهور حزينه 
غير مبالى بما أصاب قلبى من أحتضار من تحت رأس حُبه 

***


إنتبه !! 
تحتمل حواء كثيراً
و تسامحك عندما تُخطئ بِحقها
, لأنها تُحبك ..
و لكن حينما تستهين بجرحها و إغضابها 
و تعيد الكَرَه مرات و مرات ,,
فحينها لا تتعجب من رؤيه إنسانه تمتلئ بكُرهك 
و الرغبه بالثأر لمشاعرها و كبريائها .. 

***


لا تستخف بعاطفه حواء ,
فقد أشبعتك أمك حناناً حتى أصبحت رجلاً
و ما زالت تمنحك إياه ! 
حواء لا تبخل بمشاعرها
 كما تبخل أنت عليها بمشاعرك !! 

***


إذا عَشِقَت حواء 
تكون على إستعداد أن تمنح كل شئ
و تضحى لأجلك بأى شئ 
و تواجه الجميع لأجلك
رغم خجلها من التصريح بمشاعرها نحوك للأخرين

***


سأحتفظ بقلبى بعيداً عن أيدي أى رجل
حتى أحميه من حماقته و قسوته 

*** 

عفواً أدم ... 
فحواء مسؤليه أنت لا تستطيع تحملها
رقتها 
و حساسيتها 
و عاطفتها 
و عطائها 
قليل منكم من يسطيع أن يصونها 
و كثير منكم من أهملها و أستخف بعاطفتها 



لــ ياسمين جمال 
17\4\2012



المشهد الأخير


حينها جلست أترقب ما سوف تعلن عنه 
ظننتك ستخبرنى كم أشتقت لى و كم أنا مهمه لك ! 
فكل أفعالك لم تكن تنم إلا عن  حب و أشتياق
ثم و جدتك تطلق الضحكات و تهرتل بكلمات غير مرتبه 
و تمزح فى وقت لا يتحمل المزاح و ساعه لا تقبل الضحكات 
تحدثت عن حُجج لا يتقبلها عقل عاقل 
ثم أخبرتنى بأن كل شئ قد أنتهى 
و عندما أعلنت نظراتك الرحيل ,, أمرت جميع ما أحمله من ذكريات أن تفر هاربه معك ! 
حزننت كثيراً لأنى أستطعت مواجهه الجميع لأجلك و أنت لم تستطيع حتى مواجهه نفسك لأجلى 
لــ ياسمين جمال 

الجمعة، 13 أبريل 2012

عريس بلاستيك

معناها أيه 
أن يجي عريس و يقول و الله يا عمى أنا طالب أيد بنتك الانسه الانسه بنتك حضرتك 
أوبا ده مش عارف أسم العروسه حتى ! 
نفترض أن عمو أبو العروسه مخدش باله  أو عمل هندى 
هيسأله بطبيعه الحال .. شوفتها فين طيب ؟ 
الإجابه المزريه للعريس الحيله 
شوفتها فى السوبر ماركت و هى بتشترى عصير جهينه جوافه 
لالا إجابه نموذجيه برافو بجد 
أبو العروسه .... يا ترى يا أبنى أيه الى خلاك تيجي تتقدم لبنتى دوناً عن البنات 
يرد بقى الاجابه النموذجيه للعريس العصرى البلاستيكي 
بنت حضرتك زوق زوق زوق 
من عيله و سمعتها زى الفل و مال و جمال و كفايه أنها بنت حضرتك يا عمى 
ملحوظه هامه هو ذكر كل حاجه ماعدا العقل و التفكير و المنطق 
طب أفرض طلعت متخلفه عقلياً 
هبله مثلاً 
هربانه من مستشفى المجانين 


تبقى ساعتها لبست ايها العريس العصرى ( المودرن ) 
مشكلت العريس اليومين دول أنو بيجي على الريحه يعنى من الاخر بيجي بالوصفه السحريه 
هتقولولى يعنى ايه ؟ 
أقولكم أنا يعنى أيه 
يعنى ماما أنا نويت أجوز و مالو يا حبيبى طنطك فوزيه من بكره نجيبها تشوفلنا عروسه 
و تيجى طنط فوزيه و معاها لسته مليانى أسامى بنات القاهره الكبرى و ميدان رمسيس و الجيزه و شبرا الخيمه 
فلانه الفلانيه بنت فلان الفلانى على قلبو قد كده و لما يتكل هى هتورثو لانها الوريثه الوحيده  ( الله يرحمك يا رجوله ) 
و فلانه الفلانيه هاى أوى و متخرجه من مدارس لغات ( علشان لما يجي يطلب منها حاجه يطلبها بالعنجليزى أدام البشر و هو اصلا مش فاهم هى بتقول ايه ) 
و فلانه الفلانيه من عيله و دكتوره قد الدنيا و حاجه كده تشرفك فى الحفلات ( أكنها بدله مثلا ) :\ 
و العروسه الهبله الى توافق بقى تشبط فيه و تمشى بمبدأ هو حد لاقى عرسان اليومين دول 
يعنى من الاخر مش مشكله هو متقدم على اساس ايه و هل التفكير متوافق و لا لا 
المهم ثم الأهم برستيجه فى الحفلات و الافراح
 و انها متبقاش عانس و تبقى مدام الاستاذ فلان الفلانى و تكتب على الفيس انجيجد 


للأسف عايشين فى مجتمع أخر حاجه بيفكر فيها العقليه و التفكير و كل حاجه عندهم المظاهر و بس 
و البس يا عم الحج فى جوازه و البسى يا ست الكيتكوته فى جوازه 
و تانى يوم يكتشف ان العروسه هبله و هى تكتشف ان العريس طمعان فى فلوسها 
و شهر اتنين البت حامل و هما مش طايقين بعض و تروح المستشفى تولد فى نفس اليوم الى ورقه طلاقها و صلتلها فيه 
و العيل الغلبان يتشحطط بقى شويه عند ماما و شويه عند بابا و شويه فى الشارع ده إن منحرفش ! 


كل ده علشان الهانم عاوزه تكتب انجيجد على الفيس 
و علشان البيه عاوز واحده تظبطله برستيجه 
:S  

لـ ياسمين جمال 
14\4\2012



الخميس، 12 أبريل 2012

تلك الكائن


صغيره بحجم أصبع اليد 
تمتلئ بالأبتلائات و المصائب 
يعشقها كثيراً من الرجال و يمارسون رجولتهم فى تناولها 
 ليس لها معنى , طعم , إفاده 
و بالرغم من كل هذا إلا أنها قد تكون السبب فى موت الملايين 
هذا الأختراع الذى لم نرى من خلفه الخير 






( السيجاره ) 

لماذا حاول الرجل منذ البدايه تناولها ؟؟ 
هل يراها شرط من شروط إكتمال رجولته ! 
هل يرى أنها قد تزيده فى نظر الكثيرين ! 
هل يرى أنها قد تمنحه المظهر الجذاب ! 
هل تنسيه همومه ؟ هل تخفف عنه ألالامه ؟
إنها تفعل معكوس كل هذا ..
لا أرى أن الرجل ذو السيجاره المبدده فى يده طيله يومه 
إلا طفلاً لا يبالى بمصلحته ,
 و يضر نفسه ,
فكيف لعاقل أن يضر نفسه بنفسه ؟؟ 
و إذا أراد الأمتناع عنها يظن البعض أنهم ليسوا بقادرين عن الامتناع عنها 
فكيف تسمح لهذا الكائن أن يتغلب على إرادتك و عزيمتك ؟ 
كيف لك أن تترك زمام أمور حياتك لهذه اللفافه التى لا تحمل بداخلها الا المصائب ! 
الأمر يحتاج إلى الانتباه ,
الأمر يستحق إعاده التفكير ,, 


لـ ياسمين جمال 

ليه تنتخب واحد عاقل لما ممكن تنتخب واحد مجنون !

مرشحوا الرئاسه الكرام ,
أحب أتكلم الأول عن حبيب قلبى الاستاذ الدكتور العظيم المعظم زعيم الشعب و الأمه و مالك ملوك البحر الفحلؤى 
دكتور \ توفيق عكاشه 

يا ترى لو مسكتنا هتعمل فينا أيه ؟؟؟؟ هاه ؟ 
( سؤال يطرح نفسه )
- شبشب حمام لكل مواطن 
- دكر بط لكل بيت مصرى 
- فصول لتعليم كيفيه تزغيط البط و الوز 

- رحله مجانيه لكل المواطنين كل اسبوع لبحر البقر لتدعيم إنتاج البولوبيف 
- جمع تبرعات لمصر من جميع دول العالم لان مصر أم الدنيا و لما أم الدنيا تقع فى أزمه لازم كلنا نساعدها , و الناس بتحب مصر لذلك ( أتبرع و لو بجنيه ) 


- كلمه ست هتتشال من القاموس و هتتبدل بكلمه ( وليه ) 
- إجبارى لكل ستات أقصد ( وليات )  مصر
إذا كنتى نايمه أصحى 
و إذا كنتى صاحيه نامى
و لا أقولك أصحى علشان تنامى 
- العمل الرسمى لجميع ( وليات ) مصر هى الولوله و دكتور توفيق هيوفر جميع فرص عمل فى مجال الولوله لكل ستات أقصد وليات مصر 
- سحب كميات الكحل و المسكره  من جميع الاسواق المصريه حيث أن دكتور توفيق شايف أن الست من دول أقصد الوليه تبقى منقبه و حطه الكحل 
حطه الكحل ليه يختى ؟؟ هاه ! 
( أموت و أعرف مين الى عرفك على الممنوعات دى ) ؟؟!


 -السواقه حرام شرعاً للست المنتقبه لأنها بتسحر الناس و تفتن الأعين 
و هيطلع سعد الصغنن يغنى و يقول 
( و تسوقى عربيه ليه يا وليه ) !
- انتى يختى جمالك فتان أوى علشان تتنقبى , دى بقى مش بتدارى حلاوتها لا دى بتدارى وحاشتها ( شوفتها فين يا خويا :\\ )
 - مصر هتبقى عباره عن طبق سلطه بلدى - 



- تغيير أسم المخلوع فى البطاقه الشخصيه الى ( الراجل أبو شلاضيم ) 
الى هو ميييييييييين ؟ حسنى
 ( أخد بالك أنت ! )

- تغيير أغنيه (ماما زمانها جايه جايه بعد شويه جايبه معاها شنطه فيها ووزه و بطه) إلى (جايه معاها شنطه فيها بقره و بطه !)
- متقوليش و لا علم و لا بتنجان لو عارف وقفه البقره فى سوق المواشى بكام يبقى أنت كده قشطه جداً و أترشح للرئاسه و متخليش فى نفسك حاجه يا عم الحج
سوق التلات فى المنصوره غير سوق شبين 
سوق الجيزه غير سوق الزقازيق
سوق المنيا غير سوق أسيوط 
أقلها 10 جنيه و أقصاها 20 جنيه 
لو أنت عارف المعلومات الخطيره دى
يبقى أنت أكيد أكيد رئيس لمصر ! 
- بتوع الفيس بوك و التويتر و البلوجر و الناس دى .. هاه , أخدين بالكم انتو
ممنوع الفيس بوك و التويتر منعاً باتاً علشان بتيفسد أخلاق الشباب ! 
- هتجيبوا منين انتو فى حلاوه و جمال و طعامه دكتور توفيق 


هتجيبوا منين الجمال الطبيعى الى عندوا روحوا شوفوه على الطبيعه بس كده 
هو بيقول أنو فى الTV  أقل من الطبيعه لان الاضاءه عندهم وحشه 
مش عيب يا دكتور توفيق تعيب فى الاضاءه بتاعه القناه بتاعتك ؟؟
 لا ملكش حق يا راجل 
لازم نهتم بتحسين النسل لان  رئيسنا ان شاء الله جدو كان عنيه لون البرسيم الى هو بيتغذى عليه  و لونه ابيض زى البويه ( كان عنده بهاق ) 
و خدوده حمرا ( ده حرارته كانت عاليه ساعتها بس ) 
شعره كان أصفر ( مسمعتش عن الصبغه و لا أختراع لسه موصلكش ؟ ) 
بالظبط و كان شبه الاجانب و الناس كانت بتفتكره من بيلاد أروبا 
( كل ده فوتو شوب ) 

((((((((((((( مفجأه الموسم ))))))))))))
تعيين أحمد زبايضر نائب رئيس الجمهوريه 
و ساعتها إجبارى على كل مواطن أن يكون عنده لدغه فى حرف ( ر ) 
و تربيه النشأ الى هما الاطفال الصغننين على أن حرف الراء اتلغى فى المناهج القديمه و بقى حرف الياء 
أحمد سبايدر بيضحى بمستقبله و هيسقط و هيشيل مواد علشان مصر تعيش 
ياااا على التضحيات ياااااااا بجد 
( محدش معاه مناديل لحسن التضحيات خلتنى مش قادره أحوش دموعى ) 

و فى النهايه فى الراجل ده لو مسك 
فإذن ساعتها 
( مصر ما هى إلا طبق سلطه بلدى و ما نحن إلا الشنكحاويين الزعبلاويين ) 
و تعلن منظمه الصحه العالميه عن إحصائيه تفيد أن
 70 مليون مصرى دخلو مصحات نفسيه 
و لو عاوز تعمل خير هتبنى مصحه بدل متبنى مدرسه !

أنتخبوا دكتور توفيق رمز البطه  !




لـ ياسمين جمال 
12\4\2012





الثلاثاء، 3 أبريل 2012

أحبك فى صمت !


أحببتك فليتك تعلم بما أحمله لك فى قلبى ! 
الكثيرون يظنونى فقدت جميع ما أمتلك من مشاعر 
أنا أيضاً كنت أظنُ ظنونهم تلك , 
إلى أن أتيت أنت و أثبت للجميع بما يحويهم نفسى 
أنى ما زلت أمتلك الأمل فى الحصول على قلب يرافق قلبى 
يتفهمه ,
يحتويه ,
لا يتخلى عنه ,
لا يعرف معه طريقا للقسوه ,
قلب يجعلنى أطمئن أن قلبي عاشق لمن يستطيع الأحتفاظ به ,,
لقد أنتقلت بى من عالم أسود قاسى صنعه غيرك ,
إلى عالم ملئ بالأمان بالحب الذى لأول مره أستقبله بعدما كنت أمنحه فقط 
لن أصرح لك لأننى ,
أصبحت أخشى جميع الرجال..
أخشى  أن تثبت لى نوعاً أخر من مكر الرجال ..
أخشى أن تكون أنت أيضاُ مثلهم , تريد أن تملئ وقت فراغك و حسب .
أخشى أن تمل من حبى لك يوماً و أن أصبح لك قيداً ,,
أخشى أن تتركنى وحيده فى مفترق الطريق ,,
أخشى الأيام أن تجعلك ترانى بشكل سئ لا تحبنى فيه ,
أصبحت أخشى كل شئ قد يجعلك تتراجع عما تشعر به نحوى الأن ,
أقف على بعد أنتظر و أشاهد ما تكشفه لى الأيام ..
أناس نالوا من الحب ما لا يستحقوه !
و أناس نالو من الأحترام ما لا يليق بهم !
و أناس لاقوا أهتماماً لم يقدرو قيمته !
بينما على الجانب الاخر أرى أخرين ..
يستحقون أن ينالوا الحب و يمنحوه بأستفاضه !!
و لكنى أصبحت أخشى أن أمنحه ,
يستحقون التقدير و الأحترام  !!
و هذا كل ما أستطيع منحهم إياه ....
حتى يحين الميعاد !

فقط أنتظر  ما تخبئه لى الأيام و ما تكشفه لى الأيام الأخرى ! 

لـِ ياسمين جمال 
3\4\2012