أفتح قلبك و أحلم !!

أفتح قلبك وبص لحلمك ,,

حب الناس ..

أعرف أنك من غيرهم مش هتعرف تعيش 

بص لبكره شوف أنت نفسك أيه !

 قوم علشان تحققه .. 

قاعدين بنعمل أيه ؟!

 الحلم مش هيجلنا و أحنا بنتمناه بس لازم نوريه اننا مرحبين و مهتميين بيه ,!

دور ....

 اتعب......

اطحن نفسك.. فى كل حته علشان تحققه .

كل يوم قبل متنام حط فى نيتك انك رايح علشان تحقق حلمك و انت نايم 

رايح علشان تفرح بيه و انت محققه حتى لو فى عالم الاحلام و الخيال

رايح علشان تشوف حاجه انت واثق ان ربنا هيحققهالك فى المستقبل !!

ليه ميبقاش عندك أمل فى بكره .. بعده , بعد بعده , بعد سنتين تلاته اربع عشره حتى !

ليه متحلمش ؟!!؟

  الحلم هو الى بيخليك تعمل الحقيقه 

تعرف تحس بالأنتماء نحيتو !

أه تحس بالأنتماء نحيه حلمك 

أنو ده بتاعك أنت لوحدك لازم تحققوا و تخليه واقع 

لازم تولده ( متفتحليش بوقك اقفله هو انا قولت ايه غريب !.. ) 

حلمك ده مين الى هيحققه جيرانك مثلا ؟؟!!

أكيد لا انت الى هتحققه و انت الى هتوجده و تخليه واقع 

حس ان ده ملكك و لازم يبقالو مكان فى الواقع 

اعتبره ابنك ...!

و انك عاوز تدخله المدرسه و تحجزلو مكان كويس فيها ..

مهو حلمك بقى بتاعك انت لوحدك !! 

لو اهتميت بيه و راعيته .. هيطلع حاجه و هيشرفك ,,

لو رميتو و اهملته و لا هيطلع اى حاجه و يمكن يجبلك العار .. 

هو ده حلمك !!

عمرك فكرت فيه بالطريقه دى .؟؟ 

و لا اعتبرته مجرد حلم و خلاص !!

حب حلمك و احجزله احسن مكان فى ارض الواقع 

متقولش الظروف .. 

لو قلت كده يبقى فى حاجات كتير انت مكسل تعملها !!

بتتحجج بالظروف !!

1- ثق أن مفيش حاجه بعيده على ربنا أرفع ايدك و ادعيه كل صلا 

2- خلى عندك أمل فى بكره 

3- ثق فى نفسك و فى قدرتك علشان لو حسستها بالثقه هتعمل المستحيل 

( نفس كل واحد فينا انسان لو مشجعتوش و رفت روحه المعنويه هيجيله احباط و مش هيعمل اى حاجه ) 

4 - ربي حلمك و كبره و احجزله مكان فى الواقع 

5 - احضن حلمك اوى و حس بيه ^^ 

مش يلا و لا ايه بقى !! 

قوم حقق حلمك بقى فى ناس كتير هتفرحلك !!

ياسمين جمال 

29\9\2011

هلوسات ..

قد تكون مجرد

هلوسات ...

شخبطات ..

هرتلات .

و لكن هناك ما يجب أن نخرجه من أعماقنا ,,

قبل أن ينفجر فى أنحائنا ..

و يصيبنا و يقتلنا أحياءً ..

هناك مشاعر لا توجد بقاموس اللغات جميعها  !!

نعم ليس لها ترجمه . .

فلنخرجها حتى و إن كانت ,

تعبيرات ,,

هرتلات ,,

بكاء ,,

ثرثره ,,

طاقه ,,

كلها وسائل لإخراج شئ محبوس بدواخلنا ..

هناك أحدهم يمكث بداخلك .. 

ليذكرك بما لا تحب أن تتذكره 

ليعيد لك مشاهده فيلم قد شاهدته قديما 

ليوخزك بإبره رفيعه جدا فى قلبك 

ليدعس على مراكز و نقاط موجعه به 

تريد البكاء فلا تستطيع 

تريد الصراخ فلا تستطيع 

تريد البوح فلا تجرئ 

تريد الجميع فلا تجدهم 

تريد الراحه لذلك الكائن الصغير الذى يمكث بداخلك

فلا تجدها حتى تأتى له بها قبل أن يموت

لكل منا طفل يقبع داخله 

يريد الكثير و يجد مضادات الكثير .. 

يبكى فتضع يدك على فمه

 حتى لا يدرى أحداً بأوجاعه .. فيتهموك بأهماله .. 

يصرخ فتجحظ له بعيناك حتى يصمت .. 

طفل هو !! لا يتحمل فيخر صريعاً .

مات الطفل و تبقى هذا الذى يوجعنا وحسب ,,

تبقى هذا الذى يدعسنا و يعتصرنا وجعاً .. 

بأختصار شديد ..

لقد قتلنا البراءه بداخلنا بأيدينا 

و أحيينا الوجع أيضا بأيدينا 

فسحقا 

سحقا

سحقا 

!!!!!!!!!!!!!!!!!!!!!! 

أكتب لعلى أرتاح ,, أكتب لأنى لا أستطيع البكاء 

أتوجع و لا يتفهمنى أحد . 

لا أستطيع التفوه لأنى لا أستطيع الترجمه 

26\9\2011

ياسمين جمال

أصنام ثلج و حسب !!

أعتدنا على وجود أشخاصاً

تميزو .. 

 تألقوا .. 

تفننوا .. 

فى جعل أنفسهم نسخه من المثلجات

و يا رتهم حليب دول لمون و مززين يع .. 

نعم الواح من الثلج هم  !! 

يتسببوا فى البلاء و يمدحون أنفسهم .. 

يتسببوا فى حزن الكثير و يدعون أنهم ملجئ لكل من شعر بضيق .. 

يجرحون و يطعنون و يقتلون ثم يقدمو لك كلمه أسف \ ه بكل مره .. 

يقتلون القتيل و يقدموا التعازى لأهله و أصدقائه .. 

يصفون أنفسهم بالحكماء مفاجئينك بأفعالهم الصبيانيه !!

لا يعرفون كيف يميزون بين معامله هذا و هذه و هؤلاء .. 

مصابون \\ بعمى \\ الالوان \\ هم !! 

يعاملون الجميع بطريقه واحده 

جاهلين أن هناك ما يسمي بتذوق شخصيات الاخرين !!

و منحهم ما يتلائم مع أشخاصهم .. 

نعم لا يمتلكون أى تعبيرات الا نادرا من الوقت !! 

لا تبالى لكل من كان سبباً فى أذاك و أتركه ينشر سمومه حتى يصل الى نفسه و يقتلها .. 

( تجاهل اى تلجه معديه فى حياتك سبها تسيح مع نفسها و متبصلهاش ) 

لا تترك أذناك لكل من أمتدح نفسه لأن من مدح نفسه مزموم لا محاله .. 

و لا تستجيب لأشارات أحدهم بعد أن أغلقت أبواب قلبك تجاهه .. 

فعليك أن تعلم أن الواح الثلج ذائبه لا محاله 

ليصبحوا أشخاص

خاويين .. 

فقراء .. 

لا يملكون الشخصيه التى تميز انسان عن أخر !! 

و لا تستجيب للألواح الثلج فقط تجاهلها و الايام و السنون ستذيبهم 

دون أى تدخل منك .. فهم لا يستحقوم أن تبذل تجاههم المزيد 

لأنهم ..

أصنام من  ثلج و حسب !! 

 

19\9\2011

عيد ميلادى ال 19 \\ و لأول مره ..

بعد أعياد ميلاد أستمرت من يوم ولادتى لحد دلوقتى مفيش عيد ميلاد 

الا متكون نص بورسعيد معزومه ,, و الصحاب و القرايب و صحاب الصحاب 

من يوم موعيت بقى على اعياد الميلاد و أنا كل عيد ميلاد بنتظر مصيبه

 ( و تم ذكر ده بالتفاصيل  السنه الى فاتت فى موضوع مخصوص ) 
http://egyptianstudent-yasmeena.blogspot.com/2010/09/blog-post_16.html

قررت العيد ميلاد ده محتفلش و كان قرار غريب .. لكن 

مشى اليوم عادى جدا اخويا دخل عليا ببوكيه ورد و هو مكسوف 

و اختى بتاعه الثانويه اعده تذاكر مش فاضيالى 

و بما انو يوم جمعه فبابا مش فاضيلى خالص و حتى نسى يقولى كل سنه و انتى طيبه 

لكن خلى ماما تاخدنى للجواهرجى انقى حاجه و انا انتقمت و خربت بيت الراجل علشان يبقى ينسى تانى :D 

و ماما الغلبانه هى الى كانت بتحاول ترضينى بأى شكل و تحسسنى باليوم .. 

و عاوزه تبعد عنى البلوه الى بستناها كل عيد ميلاد .. 

بعتت جابت تورته من الحلوانى من غير معرف  و مجرد بنفتح العلبه لقينا

مثال على التورته مش تورته :D  

دى بلوه بس متعتبرش بلوه اوى دى بلوه مضحكه :D 

اول مطفينا الشمع اخويا العزيز دخل و نام و اختى راحت تذاكر  :D  حبك النوم و المذاكره الوقتى 

و ماما حبت تعملى جو من المرح فاخدتنى و خرجنا و رحنا الاستوديو و اتصورنا :) 

المصوراتى اللطيف فى الاخر و احنا بنقى الصور الى يعملها بقوله الصوره دى حلوه لقيتو بيقولى 

بس ماما فى دى احلى !! 

:D  طيب بالنسبالى انا شفافه مثلا ؟؟ 

كنت حريصه جدا على انى اخد صوره الساعه 11 لحظه تمامى ال 19 :D

 و اعدتهم ربع ساعه استنى الساعه تيجي 11 

اظن اهبل من هيك ما فى :D:D  

روحنا و كان بالنسبالى من اخف اعياد الميلاد الى قابلتها و اقلها كوارث 

لكن بالنسبه للشهر هو فقر مفيش فايده :D !! 

ممتنه طبعا للناس الى اتصلت بيا و كلفت نفسها ووقتها علشان مكالمه بسيطه بس فعلا فرقت معايا كتير :) 

أفتح قلبك 2 ..

عارف لما تدحك على الناس و على  نفسك و تحسسها أنك مبسوط ؟؟ 

لكن أنت من جواك حزين !! 

أكيد الزعل ده سببه حاجه كبيره 

بنمر بتجارب و بتفشل او بنكتشف انها فاشله من الاول 

ليه دايما لما بنمر بتجربه بنفضل نبص فيها للجانب الوحش !! ؟؟ 

( أنتى بتقولى تجربه وحشه أيه الجوانب الكويسه يعنى الى هتكون فيها ؟؟؟ ) 

أه فيها جوانب كويسه ربنا خلق كل حاجه فى الدنيا فيها الحلو و فيها الوحش 

- بص لنص الكوبايه المليان 

- شوف اتعلمت ايه من التجربه .. 

- وأعرف أن أنت عندك صندوق

 الصندوق ده مليان تجارب حلوه و تجارب مره 

التجارب المره دى بمثابه دروس و دروس تمنها غالى عندك فى صندوقك 

عمرك هتكرر  غلطه اتعلمتها من التجربه دى ؟؟؟؟ 

اكيد لا 

انما التجارب العاديه الى مرت بسلام عمرها مهتعلمك حاجه 

هى بتسعدك انما مش بتعلمك .. !!

أفتح صندوقك و بص أنت أتعلمت أيه من التجربه المره علشان متكرروش .. 

أنما متعدش تبص للحاجات الى زعلتك و خلاص 

تجربه و عدت أتعلم منها و متزعلش عليها 

أنت أشتريت حاجه غاليه ضافت لخبرتك و ضافت لعقلك و ضافت لفكرك 

التجارب القاسيه زى الحااجات الغاليه القيمه الى بتشتريها و بنحافظ عليها 

حافظ على تجربتك و استفيد منها ارمى ورا ضهرك الى بيزعلك فيها

 * لكن حافظ على قيمه الحاجات الى أتعلمتها منها .. 

أتبسط أنك أشتريت حاجه غاليه و أنها معاك 

متزعلش على الفلوس الى دفعتها فيها لانها تستحق الى ادفع فيها 

( هو ده الى بنقوله لما نشترى حاجه غاليه اوى ) 
و أعرف أن الحاجه الرخيصه ملهاش قيمه و لا ليها لازمه 

حبيت أتكلم عن التجارب المره دى  فى صفحه لوحده 

علشان كلنا مرينا بده و كلنا محتاجين نفهم أننا معانا حاجات غاليه 

مع أنى بحب الفصحى لكن أتكلمت بالعاميه علشان أوصل لقلبكو 

( أحنا معانا حاجات غاليه لازم نستفيد منها و نحافظ عليها ) 

ياسمين جمال 

16\9\2011

أفتح قلبك ..

عارف لما ساعات تيجي تقول انا مخنوق و لما حد يسألك ليه تقوله معرفش ؟؟ 

ساعتها هو بيفتكرك مش عاوز تقول السبب بس أنت فعلا بتكون مش عارفه .. 

عارف بقى ايه الى بيبقى مضايقك ؟ 

حاجات كتير تعالو نشوفها سوا .. 

- حد احنا زعلانين معاه سواء هو أو احنا الى غلطانين ,, صالحه .. ايه ؟؟ مستغرب ليه !! أه حتى لو هو الى غلطان صالحه 

طيب تيجى نفكر تصالحه ازاى ؟؟ استنى بس انت مستعجل على ايه !! كمل كلامى للاخر !!

شوف حاجه الحد ده بيحبها .. مممم مثلا بيحب الشوكولاته .. متعرفش تجيب علبه شوكولاته و تجيب ورقه يا سيدى بلاش كارت 

و تكتب فيها الى \---- مش حابب الوضع ده و زعلانين من بعض و اتمنى متزعلش منى .. انا فعلا مش حابب ان يكون في بينا زعل اتصل  بيا اول متقرا الورقه .. 

يقوم يتصل بيك كلمه منك على كلمه منو رجعتو اصحاب و حبايب 

لو معبركش خلاص يولع و لا تزعل نفسك :D  !!

ايه خسران حاجه انت كده ؟؟ ده انت بتصالح حد ممكن تكون خسرته على حاجه هايفه او كبيره حتى ليه تسيب حد زعلان منك حتى لو هو الى غلطان .. شوف بقى لما تتصالحو هتبقى سعيد قد ايه و مبسوط و هتحس ان فى جزء من الحمل خف عليك .. 

- تيجى نشوف بقى الحاجه التانيه ؟؟ ! كمل برضو حتى لو الكلام مش عاجبك مش يمكن تلاقى حاجه تعجبك و تقتنع بيها !!

الكلام و النم ..

 سمعت أن فلان اتكلم عليك مثلا  .. تقوم هوب فجأه قالب على فلان من غير حتى متتأكد من الكلام . يقوم هوب فولان يتقمص و معتش يتكلم معاك يقوم هوب فى الاخر تكتشف ان الى قالك  ده موقعاتى من عواجيز الفرح 

طيب ليه حتى لو هو اتكلم عليك بجد هتعمله ايه يعنى ؟؟ ليه تخسره على الفاضى

 متقولش ميلزمنيش..!

مش يمكن كان مضايق منك ساعتها و قال كلمه كده بس هو اصلا بيحبك ..  

متظلمش حد محدش عارف الى فى قلوب الناس ايه ...

جرب كده تخلى قلبك يحب كل الناس و يسامح حتى لو الشخص ده غلطان فيك 

هتحس قد ايه انت جواك قلب نضيف حتى لو مضايق برضو بس قلب نضيف و سامح 

طيب مبيكرهش حد .. ابقى تعالى لوقنى بطوبه لو طبقت الكلام و محستش انك مرتاح .

 

تيجو نشوف الحاجه التالته .. أنت يا عم أصبر متقفلش كمل بس أنت خسران أيه .. ؟

أيه رأيك تعمل خير و فى نفس الوقت تسعد ناس ^^ 

أيه رأيك مثلا تاخد بعضك ( لوحدك متجرليش 80 واحد معاك ) 

انت و صاحبك مثلا و تروحو دار ايتام .. 

هات لعبتين تلاته و شوكلاتين تلاته و حلويات حاجات من الى بيحبها الاطفال دى .

و روح دار ايتام و اتفق مع مشرف انك عاوز مثلا طفلين تلاته

 متعملش حفله عليهم بقى و تعد تتصور معاهم علشان تعمل منظره و خلاص اكنك جاى المتحف 

اسعدهم من قلبك و العب معاهم من قلبك بعيد عن عين الناس من غير محد يعرف من غير متعمل حاجه تاثر فى نفسيتهم و تحسسهم انك جاى تتعطف عليهم 

تخيل ان انت فى يوم هيبقى عندك طفل زى ده ,, شوف هتعرف تتعامل و لا لا ؟

و لما تشوف الضحكه على وشهم و الانبساط الى هما هيبقوا فيه و انهم عاوزينك تيجي كل يوم مش مره و خلاص هتلاقى نفسك كل متضايق بتروحلهم علشان ضحكتهم تفرح قلبك و دخلتك تفرح قلبهم .. 

مش يبقوا ارفانين منك و انت بتتمنظر بيهم و مبيصدقوا تمشى  و يتمنوا انك مترجعش تانى .. 

(إلهى تروح مترجع يا بعيد ,, جتكو البلاوى )

فى مره روحت دار ايتام كان جروب كبير رايح المشرفه كانت بتهدد البنات الصغيره علشان تبقى لطيفه و تدحك معاانا :@ و هما مش عاوزين يتصوروا و الناس بتتصور معاهم بالعافيه ؟؟!! هو فين الخير فى ده 

دى كل الى ممكن اطلقوا عليها 

منظره !!

عاوز تعمل خير متقولش للناس كلها تعالو اتفرجو انا بعمل خير 

و شوف قلبك هيبقى مرتاح ازاى لما تعملو من قلبك علشان خاطرهم مش علشان خاطر نفسك و خلاص !! 

ها كفايه عليكو كده نكمل المره الجايه الى حاابب يكمل كلام معانا يقول و هبعتلو دعوه مخصوص :) 

يا رب نتغير للاحسن مش للاسوء 

و نحب الناس من قلبنا 

حبيبي يختلف :)

قد لا أكون أنا ليلى و لا جوليت و قد لا تكون أنت مجنونى و لا أنطونيو و لكننا أثنين و أى اثنان من يكون حبيبها بحر و حبيبته حواء تعلم انه يملك من الاحباء مئات و قد تكون الوفا وقد تفوق العداد فاى حب هذا لا تغير فيه حواء ,, حبك انت يا بحر يشاركنى فيه المئات و لكنى اعلم اننى اختلف اختلاف .. فانا اعشق البقاء فى احضانك و لا اخشاك .. لن اقف على الشاطئ كباقي الاخريات ,, و انتظر ان تكون موتتى داخل حماك .. فلم أأمن لبشر و لا لجماد و لكنى أأمن لك يا من جعلتنى اشبه بالاميرات ,, و ها انا ذا اقف لأنتظر الشتاء ليغيب عنك الجميع و اذهب اليك فى الخفاء .. فلا يسمع حينها شكواى سواك ..... 

ترفعى عن كل ما لا يليق بكي !!

ملحوظه : هذه الاسطر يكمن بها وجهه نظرى الشخصيه التى قد يعارضنى فيها البعض !!

بدايه أراكي كائن جميل

رقيق , ناعم , عذب

لا تستحقين الا من يقدرك

لا تستحقين الا من يحافظ عليكى

لا تستحقين الا من يسعى لإسعادك .. لا لإسعاد نفسه بكِ

فهذه مهمتك أنتى و ليست مهمته هو و لكن إن أستحق ذلك ,,

أحذري الرجل ,, فهو كائن ملول .

يمكن أن يتركك فى أى وقت ( علشان مش أنتى مش على مزاجه دلوقتى )

من أحبك دخل بيتك من بابه ( هيدخل من وش البيت مش من قفاه )

من أحترمك ,, سيكون بجميع حالاته , يكن لكى التقدير و أحترامه ( مش شويه يحترمك و شويه يطول لسانه عليكى )

مهما غضب , سيحافظ عليكِ ..

إن أخطأ بحقِك .. لن يجد فى الاعتذار صعوبه ..

*ترفعى عن أى شئ يقلل من كرامتك ..

فالجمله الشهيره ( خلينا أصحاب أحسن ) .

يمكن للصداقه التحول إلى حب و لكن العكس غير صحيح ..

 ( لو ده نوع من البقشيش العاطفى يبقى دى قله كرامه و بناقص منه خالص , )

من أحبك . كانت دموعك له شئ باهظ الثمن . حرصه على أن لا تذرف منه واحده فقط .. !!

من أحبك حرص أن لا تضعى رأسك على وسادتك فى يوم و بداخلك حزن كان هو سببه !!

من أحبك أعطاكى ثقته ., أمانه., قلبه ., ليس بالألفاظ و لكن بالأفعال !!

صدقه فى مشاعر حبه لكي لن تظهر إلا فى أوقات الذروه و الشده .. لكن غير ذلك ( لعب عيال و دحك على الدقون )

يفعل أى شئ ليرضيكى و يجعلك سعيده و لا يسير بمبدأ ( إذا كان عاجب )

يقول كلمه أسف و هو صادق بها ( مش اسف و لو مش عجبك اخبطى دماغك فى الحيط )

سيحرص كل الحرص أن لا يجرح قلبك ( غير كده يبقى بيستهبل و مينفعش يتحمل مسؤليه مشاعر بنى ادمه )
و قضيه سي السيد الشهيره .. 
لن يعاملك بمبدا انك كل وظيفتك فى الحياه اعمال المنزل فقط 
و يتجاهل اى وظائف معنويه قد تمنحيها  .. 
هو الخاسر حينها !! و لكن هذا لا يصلح لحياه زوجيه . 
من يتأرجح بين هاتان و هن و الاتى و تلك \
 ,, يعشق تاء التانيث أى كان ..
فكرها . شخصها . تفاصيل أدميتها 
لا يهمه سوي أن يكون ( الصدر الحنين للبنات ) 
(البنات كلها اخواته ) 
( بيشغل اغنيه كل البنات بتحبك كل البنات حلوين!! ) 
من يري في الفتاه الشئ الذى يتباهى به ,,
لا تعطي هذا النوع  امان حتى لو دخل بيتك من بابه ,,
لانه بمجرد ان تصبحى بين يداه ,,
سيبحث عن اخريات .. 
و الفتاه عندما تعمل مشاعرها و عواطفها يتوقف عقلها عن العمل الا من رحم ربي ,,
فلا توقفى عمل عقلك ,
 فميزنا الله عن غيرنا بعقولنا لا بقلوبنا 
و تجاهلى نبضات قلبك الى ان تسمعى نبضات باب دارك اولا ,, 
حتى لا تخسري شخصك , و احترام الناس و احترام نفسك , 
ولا تخسري قيمتك يوما تلو الاخر ,, 
كلمه 
(ارتباط) 
ما معنى كلمه ارتباط ؟
بم تفسر كلمه ارتباط ؟
علل كلمه ارتباط ؟
يعنى 
(فرفورى قالى متروحيش و فورفورتى قالتلى متعملش كده ) 
:| بقينا فى مجتمع الفرافير احنا الوقتى 
احمد مرتبط بمنى و مانعها تروح تشترى حاجه من بره الجامعه 
هو بيجبلها كل حاجه :D ( حلاوته يختى )


- سعاد سابت محمدين .. يا قلب امك يختى !! 
 * فسخوا الخطوبه و لا اطلقوا ؟؟
- لا خطوبه ايه و طلاق ايه دول فكوا الارتباط 
 * ايوه خطوبه و لا جواز يعنى 
 - لا ارتباط و لا خطوبه و لا جواز 
* يا كبدى يختى :D  


دلوقتى الى مش مرتبطه يتقال عليها معقده .. 
سبحان الله يعنى الى تحب واحد من ورا اهلها 
و تكلمه من ورا اهلها 
دى هى النموذج المثالى !! 
و فى بقى الى تقولك اانا قايله لمامتى بس طبعا مش بالتفاصيل
حلاوتها ام حسن !! 
هو فى تفاصيل كمان :D  
(بابي لارج !! ) 


رسالتى : أحتفظى بمبادئك و لو ركنتيها أرجعيلها بسرعه قبل متخسرى احترامك لنفسك و احترام الناس ليكي كلمتك بالفصحى فى الاول علشان اوصلك فكرى 
و كلمتك بالعاميه علشان تفهمى قصدى 
أتمنى تكون رسالتى وصلت 
فتذكرى أن الله ميز الانسان عن غيره بالعقل لا بالقلب ! 
تحياتى و احترامى و تقديري , :) 






\\ قد يهاجمنى الكثير من الفتيات و كثير من الرجال ايضا 
و لكن هم فى داخلهم يعلموا ان كل ما ذكر صحيح 100% 






عذرا كلامى مش مستحمل احط صور فعذرا لا يوجد صور بين حروفى هذه المره .