الجمعة، 13 أبريل 2012

عريس بلاستيك

معناها أيه 
أن يجي عريس و يقول و الله يا عمى أنا طالب أيد بنتك الانسه الانسه بنتك حضرتك 
أوبا ده مش عارف أسم العروسه حتى ! 
نفترض أن عمو أبو العروسه مخدش باله  أو عمل هندى 
هيسأله بطبيعه الحال .. شوفتها فين طيب ؟ 
الإجابه المزريه للعريس الحيله 
شوفتها فى السوبر ماركت و هى بتشترى عصير جهينه جوافه 
لالا إجابه نموذجيه برافو بجد 
أبو العروسه .... يا ترى يا أبنى أيه الى خلاك تيجي تتقدم لبنتى دوناً عن البنات 
يرد بقى الاجابه النموذجيه للعريس العصرى البلاستيكي 
بنت حضرتك زوق زوق زوق 
من عيله و سمعتها زى الفل و مال و جمال و كفايه أنها بنت حضرتك يا عمى 
ملحوظه هامه هو ذكر كل حاجه ماعدا العقل و التفكير و المنطق 
طب أفرض طلعت متخلفه عقلياً 
هبله مثلاً 
هربانه من مستشفى المجانين 


تبقى ساعتها لبست ايها العريس العصرى ( المودرن ) 
مشكلت العريس اليومين دول أنو بيجي على الريحه يعنى من الاخر بيجي بالوصفه السحريه 
هتقولولى يعنى ايه ؟ 
أقولكم أنا يعنى أيه 
يعنى ماما أنا نويت أجوز و مالو يا حبيبى طنطك فوزيه من بكره نجيبها تشوفلنا عروسه 
و تيجى طنط فوزيه و معاها لسته مليانى أسامى بنات القاهره الكبرى و ميدان رمسيس و الجيزه و شبرا الخيمه 
فلانه الفلانيه بنت فلان الفلانى على قلبو قد كده و لما يتكل هى هتورثو لانها الوريثه الوحيده  ( الله يرحمك يا رجوله ) 
و فلانه الفلانيه هاى أوى و متخرجه من مدارس لغات ( علشان لما يجي يطلب منها حاجه يطلبها بالعنجليزى أدام البشر و هو اصلا مش فاهم هى بتقول ايه ) 
و فلانه الفلانيه من عيله و دكتوره قد الدنيا و حاجه كده تشرفك فى الحفلات ( أكنها بدله مثلا ) :\ 
و العروسه الهبله الى توافق بقى تشبط فيه و تمشى بمبدأ هو حد لاقى عرسان اليومين دول 
يعنى من الاخر مش مشكله هو متقدم على اساس ايه و هل التفكير متوافق و لا لا 
المهم ثم الأهم برستيجه فى الحفلات و الافراح
 و انها متبقاش عانس و تبقى مدام الاستاذ فلان الفلانى و تكتب على الفيس انجيجد 


للأسف عايشين فى مجتمع أخر حاجه بيفكر فيها العقليه و التفكير و كل حاجه عندهم المظاهر و بس 
و البس يا عم الحج فى جوازه و البسى يا ست الكيتكوته فى جوازه 
و تانى يوم يكتشف ان العروسه هبله و هى تكتشف ان العريس طمعان فى فلوسها 
و شهر اتنين البت حامل و هما مش طايقين بعض و تروح المستشفى تولد فى نفس اليوم الى ورقه طلاقها و صلتلها فيه 
و العيل الغلبان يتشحطط بقى شويه عند ماما و شويه عند بابا و شويه فى الشارع ده إن منحرفش ! 


كل ده علشان الهانم عاوزه تكتب انجيجد على الفيس 
و علشان البيه عاوز واحده تظبطله برستيجه 
:S  

لـ ياسمين جمال 
14\4\2012



4 التعليقات:

Unknown يقول...

حلو ياجيسي برافو عليكى... بس لو ناويه تكتبي ساخر ابقي خدى بالك!!
لان في ناس هتحاول تهبط نفسيتك لو طاوعتى النقد اللي عمال علي بطال هتلاقي نفسك اتحولتى لكئيبه
ربنا يوفقك ياقمر

Sara يقول...

هههههههههه
فعلا بقت مشكلة اليومين دول !

ربنا يوفقك يا ياسوو
جميلة خالص :)
كملي

Unknown يقول...

تووووووووووحفة كتير عجبني
انتي زي العسل :* :*
الى الامام دوما

شوارد حرة يقول...


احنا في مجتمع معظم الشباب ميقدرش يتجوز اول ما يتخرج من الجامعة ويفتح بيت وانا منهم وبالتالي اي ارتباط قبل مايكون قادر اسمه لعب واستهتار وبيضحك علي واحدة نفسها تحب او تتحب وخلاص وهو كمان بيتعب قلبه واعصابه بعد فشل العلاقة وبيحط نفسه تحت ضغوط في بداية حياته البنات متعرفوش عنها حاجة بس الضغوط دي ممكن تدمره.
يعني صعب يكون ارتياط محترم قبل 27 او 28 سنة.
في السن ده كل البنات اللي كان شايفهم اتخطبوا او اتجوزو وخلفو كمان.
والمشكلة ان في السن ده وبعد مرمطة الشاب بيكون فقد كتير من الرومانسية وبيكون بقي عملي اكتر.
والمشكلة الاكبر انه تحت ضغط الوقت بمعني انه خايف العمر يجري من غير جواز اولا وثانيا الفرق بينه وبين البنات اللي في سن جواز يكبر فيبقي الاتصال الفكري صعب.
هنا وصلنا لفكرة التدوينة بتاعتك ان الشاب بسبب ده كله بيلجا للاهل علشان يدوروله - لانه ممكن يكون فقد القدرة علي الاختيار-للاسف
او الانسان عموما بطريقة لا ارادية لما يكون في اختيارات كبيرة بيحاول يشرك اللي حواليه في اختياراته علشان يتهرب من مسئولية عيوب الاختيار لو فشل.
معرفش ليه الاهل فعلا بيدوروا علي الحالة المادية (عند اهل الولد والبنت علي فكرة) .
-ممكن تكون خبرة سنين؟
-ممكن لما نكبر نعمل زيهم؟!
مش عارف
بس الاكيد ان الشاب نفسه غالبا مش فارقة معاه
هو عنده حسابات تانية خالص اهمه ضغط الوقت
معكم من قلب الحدث

إرسال تعليق