الثلاثاء، 9 أبريل 2013

تعالى اغسلى المواعين

















الأم المصريه تماماً تختلف عن أي أم
أنا مش هقول أنها سوبر ومان  ,, أبسلوتلي !! 
ده سوبر مان نفسه هيموت و يتجوز واحده مصريه بس هي الى مش موافقه ما علينا من الموضوع ده علشان كده سوبر مان انقرض
ما علينا برضو .,,. 
الأم المصريه هي  الى بتزعق و تشخط و تنطر و فى نفس ذات الوقت تدخل تعملك الكيك بالشيكولا الى انت بتحبه !! 
الأم المصريه هي الى تدعي على أبنها و تكره الى يقول أمين ! 
الأم المصريه هي الى تبقى دائماً ما تطبق نظريه أبنى حبيبي يا حبه عيني خش نام و على بنتها امشى انجري يا بت اغسلي المواعين و خاصه الكوبيات علشان الكوبيات دي حاجه مهمه جداً :D لا يخلو البيت المصري من الكوبيات المرصصه جنب الحوض 24 ساعه 
الأم المصريه الى تقول لجوزها أنت ليه مش بتساعدنى فى شغل البيت زي الازواج الرومانسيه و لما أبنها يتجوز تحرج عليه يساعد مراته فى أي هفوه فى شغل البيت !! 
الأم المصريه هي الى كل متشوفك قاعد أدام النت تقولك ,, بتدحك لمين يخويا مين الى بيدحكك أوي كده !  - قوم ذاكر - عيشي معانا فى الواقع النت الى انتى عايشه عليه ده عالم افتراضى و خيالى - يا أبنى الناس الى انت بتتكلم معاهم فى النت دول ناس وهميه ( فضائيين مثلاً و لا خارجين من فلم كارتون ؟ :D ) 
 الأم المصريه هي الى بتقفز من مود لمود تانى خالص فى اقل من ثواني لدرجه انك بتحس أنك أنت الى مش طبيعي !
الأبن و الأبنه المصريين هما الى يجوا يعملو يمين تتنرفز الام المصريه عليهم
يعملو شمال تشتمهم :D ,, طب يعملوا ايه !! فبالتالى وصلو لحاله دلوقتى من حالات البرود و التبلد الحسي علشان كده تحس الناس كلها ماشيه متنحه  ,,,  Iam serious يا جماعه الكلام ده completly  بيحصل  ,,,
ساعة أما تيجي تلمي الأطباق معاها تقولك لالالا (ساعات يعنى) و لو أعدتى بعدها تلاقي فى اطباق بتترزع فى المطبخ و كلام كده بيتقال متفهميش معناه بس هو فيما معناه أنك ( معندكيش دم و ممكن شويه شتيمه ميضرش )
مصر نفسها بيقلك هي ست لبسه طرحه لونها احمر و بادي كارينا ابيض عليه سويت شيرت ابيض و جيبه شلستون سوده :D عظيمه يا مصر !!!
و أخيراً و ليس بأخر ,, || الأم المصريه هي الأم الى الشبشب عندها مش مجرد حاجه تتلبس لا ده كمان حاجه بتتحدف و لا داعي للتفسير أكتر من كده :D

الأم  هي الى تفضل شايفه أبنها صغير مهما كبر ,, لأنه مهما كبر هي الى عملته ! :)
الأم  هي الي مهما الأب أتخلى و سافر عشان يجيب فلوس هي عمرها متقدر تبعد عن اولادها :)
الأم هي الى خلتني و خلتك و خلت ملايين زينا ناس ناضجه و عاقله تعرف تشل مخها و تفكيرها و تعرف يبقالها رأي أزاي


الأم هي أول حد حبك و أول حد خاف عليك ! أول حد أنت مديونله بحياتك كلها ,, أوعى تفتكر أنك بقيت بنى أدم ليه مكانه و كاراكتر و برسيج من نفسك كده لأ هي .. هي الى ساعدتك و علمتك لحد موصلتك لنفسك :) ......

الأم هي النعمه الى ربنا أداها لكل واحد فينا و حرم  البعض منها سواء بدري أو متأخر
متتكسفش أنك تبوس أيديها لأن الأيد دي هي الي خليتك بنى ادم :) ....................



رسوم : هدي علام
كتبها : ياسمين جمال






4 التعليقات:

غير معرف يقول...

ربنا يباركلك .....
انتى انسانه حساسه و موهوبه .

Amira Ramadan يقول...

بجد عجبتنى اووووى يا ياسمين
ربنا يخلى لكل واحد مامته ومش يحرمه منها ابدا يارب ويرحم جميع الأمهات اللى فارقوا حياتنا :))
دُمتى متألقة بكتاباتك دايما

yasmeen gamal khodeer يقول...

thnq

yasmeen gamal khodeer يقول...

ربنا يخليكي يا اميره ده من زوقك :) ..

إرسال تعليق