طبعاً ناس كتير هتقولى أشمعنى الجوافه و أيه الحكايه بتاعه الجوافه دى ؟
فحبيت أفطمكوا على الى فيها !
أنا طالبه بكليه الصيدله ......
لما دكتور يحرقلى دمى ,
لما أضايق علشان جبت درجه مش قد كده ,
لما حد من البنات يعمل فيا موقف نداله ,
بوجه عام كده لما أكون مضايقه و مخنوقه و جايبه اخرى ,
أجرى على السوبر ماركت و أشترى (عصير جوافه )!!
و يحصل الاتى :-
1- أدخل فى هيستريا ضحك محدش يقدر يوقفنى عنها فى أى وقت و أى مكان .
2- ببقى عامله زى السكرانيين بالظبط ( من الاخر الجوافه دى بالنسبالى زى الخمره ) .
3- بعد أقول كلام غريب عجيب مفيش حد بيفهم منه كلمه .
4 - لما الكميه بتكون مُركزه و بيكون عصير من النوع النضيف اوى تبص تلاقى الموضوع ده كله قلب بأغماء فى الاخر .
أكيد طبعاً محدش بيسكتلى فأصحابى لو جبتلهم سيره الجوافه يصرخوا قائلين
( لااااااا محدش يجبلها جوافه ) .
و تحسهم نواب عن الست الوالده فى الكليه ,, حيث أنهم قايمين بالواجب و حارمنى من شرب عصير الجوافه .
لو أعده بعيط و فى مشكله و أصدقائى المبجلين مش لاقيين حل علشان يهدونى
يضطروا اسفيين انهم يجبولى عصير جوافه !
أشربه ...... أتسطل ..... أضحك أضحك أضحك ...... هما و حظهم ممكن يغم عليا و ممكن لا ......
و مين الى بيتدبس فى الاخر هما طبعا اغماء و شيل بقى يا عم و عياده و مستشفى و تليفونات و خضه بقى ..,
لما بنزل البيت فى الاجازه ماما بترضى عنى اول يومين و بتعملى عصير الجوافه الى أنا مدمناه اول متشوف الى بيحصل بتحرمنى منه باقى الاجازه :(
فلما أخرج مع صحابى أجيبه من وراهم فى البيت و أستناهم لما كلهم يناموا و أقوم مطلعاه و اعد اشربه و انا اعده على النت بمزاج بقى ,,
تجيلى الحاله و أتسطل و أعد أضحك و أصحى البيت كلو و أفضح نفسى !
أحترت أعمل ايه و عملت ناصحه و بقيت أحط عصير الجوافه فى أزايز مرسوم عليها أى فاكهه تانيه غير الجوافه و تكون مش شفافه ,,
يقوم محدش يكتشف حوار أن الازازه فيها جوافه .. و أشرب براحتى بقى ,
للأسف أتكشف الموضوع من الهيستريا الى بدخل فيها فى الاول
كانت أزازه عليها شكل كوكتيل فإحدى صديقاتى العزيزات أعتقدت أن الكوكتيل ده فيه جوافه علشان كده حصل الى حصل ,,
المره الى بعدها كانت ازازه عليها شكل برتقال نفس الصديقه الى اعده متربصالى أستغربت قالت (( معقول بقى عندك الحاله دى من البرتقال كمان ؟؟)) و طبعا انا بضحك ضحكه خبيثه شريره من جوايا لانى طبعاا بشرب جوافه و ارطست كل الناس الحلوه دى
المره التالته بقى كان عصير مانجو و أجاركم الله نفس الصديقه صممت ان فى حاجه غلط بس مقالتش و اعدت تتفرج عليا و انا بشرب و بصت على قاع الازازه قالتلى و هى بتبصلى بصه خبيثه تكاد تقول (قفشتك) ايه ده عصير جوافه لونو اصفر ؟!
بوووووووووووووم .. اتفضحت يا دى الفضيحه
و فى إحدى المرات المشؤمه كنت فى محاضره و صادفت انى اول مدخلت كنت لسه مخلصه ازازه عصير جوافه ,
و فى عز صمت رهيب ساد جو المحاضره و الطلبه كلهم مركزين ,
و الدكتوره متعمقه فى الشرح إذ فجأهً ,,
صوت ضحك هيستيرى ,,,,,,,,,
تتجه أنظار القاعه كلها نحوى و معظم الموجودين من البنات قالوا هى شاربه جوافه ؟؟؟؟؟؟؟
الدكتوره تبصلى شزرا و قامت رزعانى التهزيق التمام و هددتنى بالطرد !
و لا يزال عصير الجوافه شئ يهدد حياتى بالمخاطر الاجتماعيه و المواقف المحرجه
الا انى بحبه ,,,, بس مبهربش من الواقع بيه هو مجرد شويه ضحك ملهمش لازمه بيبقوا مكبوتين و عصير الجوافه بيخرجهم .
الهروب من الواقع عمره مكان حل للمشاكل و كذلك عصير الجوافه عمره مكان بالنسبالى حل للمشاكل .
بس أنا بحبه بس نصيبى بقى ان عواقبه وخيمه عليا و على الى حوليا :))
و الى أن القاكم فى وقت لاحق لكم من جوافه هانم أطيب التحيات ,,,
لـــ ياسمين جمال
العدد التالت \\ مجله دقه جديده
